ដើរតួជាប្រពន្ធគយ បោកអ្នករត់ម៉ូតូឌុប
16-August-2016 | ដោយ មែន កំសត់
រាជធានីភ្នំពេញ ៖ ស្ត្រីម្នាក់បានដើរតួថាខ្លួនគឺជាប្រពន្ធគយ ហើយបានហៅបុរសអ្នករត់ម៉ូតូឌុបម្នាក់ឲ្យដឹកចេញពីក្នុងបុរីធូលន ស្ថិតក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ទៅកាន់ផ្សារទួលទំពូង ខណ្ឌចំការមន រាជធានីភ្នំពេញ កាលពីវេលាម៉ោង២រសៀល ថ្ងៃទី១៣ ខែសីហា ឆ្នាំ២០១៦ ដោយប្រាប់ថាទៅរកទិញគ្រឿងសង្ហារឹមយកទៅប្រើប្រាស់។
ពេលនោះបានត្រូវរ៉ូវគ្នាក្នុងតម្លៃ២៥.០០០រៀល ទាំងទៅនិងត្រឡប់មកវិញ លុះពេលទៅដល់ផ្សារទួលទំពូង ស្ត្រីនោះបានលេងបុរសអ្នករត់ម៉ូតូឌុបនោះ មួយក្បាច់ និយាយលែងចេញ ដោយមិនត្រឹមតែមិនបានឲ្យលុយថ្លៃម៉ូតូឌុបប៉ុណ្ណោះទេ ថែមទាំងបានធ្វើសកម្មភាព បោកយកទូរស័ព្ទ១គ្រឿង និងលុយចំនួន១០ដុល្លារ ពីបុរសអ្នករត់ម៉ូតូឌុបម្នាក់នោះទៀត បន្ទាប់មកបានរត់ គេចខ្លួនបាត់ស្រមោលតែម្ដង។
លុះរយៈពេល៣ថ្ងៃក្រោយមក ត្រូវបានម្ចាស់ប្រទះឃើញ នៅម្ដុំផ្សារពោធិ៍ចិនតុង ក៏បានធ្វើការឃាត់ខ្លួនបាន និងបាននាំទៅកាន់ប៉ុស្ដិ៍ចោមចៅ ដើម្បីដាក់ពាក្យបណ្ដឹង ឲ្យចាត់ការតាមច្បាប់ ប៉ុន្តែដោយសារតែហេតុការណ៍នោះ កើតឡើងនៅឯផ្សារទួលទំពូង ទើបមន្ដ្រីនគរបាលបានឲ្យនាំស្ត្រីនោះទៅប្រគល់ឲ្យ នគរបាលប៉ុស្ដិ៍ទួលទំពូងនោះវិញ។ ការចាប់ខ្លួននោះបានធ្វើឡើង កាលពីវេលាម៉ោង៣និង២០នាទី រសៀលថ្ងៃទី១៥ ខែសីហា ឆ្នាំ២០១៦ នៅចំណុចជិតផ្សារពោធិ៍ចិនតុង ស្ថិតក្នុងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
ស្ត្រីដែលត្រូវឃាត់ខ្លួននោះ ថេង សុខវ៉ន អាយុ៣៣ឆ្នាំ មានទីលំនៅក្នុងភូមិអូររលួស ឃុំដំណាក់កន្ទួត ស្រុកកំពង់ត្រាច ខេត្តកំពត។ ចំណែកម្ចាស់ទូរស័ព្ទឈ្មោះ ពេញ សារ៉ាត់ អាយុ២៣ឆ្នាំ មានទីលំនៅក្នុងភូមិស្រែគោក ឃុំអន្លង់រមៀត ស្រុកកណ្ដាលស្ទឹង បានបាត់បង់លុយចំនួន១០ដុល្លារ និងទូរស័ព្ទដៃអាយហ្វូនហ្វាយមួយគ្រឿង។ អ្នករត់ម៉ូតូឌុបបានឲ្យដឹងថា កាលពីវេលាម៉ោង២រសៀលថ្ងៃទី១៣ ខែសីហា ឆ្នាំ២០១៦ ស្ត្រីម្នាក់នោះបានពកូនប្រុសអាយុប្រហែល៣ឆ្នាំម្នាក់ ទៅហៅឲ្យខ្លួនដឹកចេញពីក្នុងបុរីធូលន ដែលមានទីតាំងស្ថិតនៅ ក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ទៅកាន់កាន់ផ្សារទួលទំពូង។
ប៉ុន្តែក្រោយពេលដឹកចេញទៅ មិនបានទៅផ្សារទួលទំពូង ភ្លាមៗនោះទេ គឺបានទៅកន្លែងអ៊ុតសក់របស់នាង នៅក្នុងផ្សារព្រៃទា ភូមិព្រៃទា សង្កាត់ចោមចៅវិញ បន្ទាប់មកទើបឲ្យខ្លួន ដឹកបន្តដំណើរទៅកាន់ផ្សារទួលទំពូង ហើយត្រូវរ៉ូវគ្នាក្នុងតម្លៃ ២៥.០០០រៀលទាំងទៅនិងមក។ ប្រភពដដែលបានបន្តថា លុះដល់ផ្សារទួលទំពូង ស្ត្រីម្នាក់នោះបានឲ្យខ្លួនឈប់ចាំនៅខាងក្រៅហើយគេបានចូលទៅក្នុងផ្សារ មួយសន្ទុះទើបចេញមកវិញបានប្រាប់ថាទិញអីវ៉ាន់អស់លុយ ហើយខ្វះ១០ដុល្លារទៀត បន្ទាប់មកបានខ្ចីលុយពីខ្លួនចំនួន១០ដុល្លារ និងខ្ចីទូរស័ព្ទ ខលរួចក៏បានគេចខ្លួនបាត់ស្រមោលតែម្ដង។
លុះដល់ថ្ងៃទី១៥ ខែសីហា ទើបខ្លួនប្រទះឃើញ បានធ្វើការឃាត់ខ្លួនប្រគល់ឲ្យនគរបាល ប៉ុស្ដិ៍ចោមចៅ ប៉ុន្តែដោយសារកន្លែងកើតហេតុ នៅឯផ្សារទួលទំពូង ទើបនគរបាលប៉ុស្ដិ៍ចោមចៅ ឲ្យនាំទៅប្រគល់ឲ្យនគរបាលប៉ុស្ដិ៍ទួលទំពូង ខណ្ឌចំការមនចាត់ការវិញ៕
ចំនួនអ្នកទស្សនា
- ថ្ងៃនេះ2081
- ម្សិលមិញ4731
- សប្តាហ៍នេះ24411
- ខែនេះ219011
- ឆ្នាំនេះ219011
- សរុប20661467